Salavan Teacher Training College

ຫໍໄຕບ້ານວັດກາງ ສະຖານທີ່ສັກສິດທີ່ຊາວແຂວງສາລະວັນສັກກະລະບູຊາ

ຫໍໄຕວັດກາງ ຕັ້ງຢູ່ ບ້ານວັດກາງ ເທດສະບານເມືອງສາລະວັນ. ເປັນຫໍໄຕວັດກາງ ເປັນມໍລະດົກອັນລໍ້າຄ່າ ທາງດ້ານວັດທະນະທໍາ, ເປັນສີມືອັນປານີດ ຂອງນັກຈິດຕະກອນບູຮານ, ເປັນຄັງສາງພະໄຕປີດົກ ຂອງສາດສະໜາພຸດ ນັບແຕ່ປະຖົມມະການ ແປດໝື່ນທຳມະຂັນ ໜັງສືສູດເທດ ແລະ ຄຳສອນຕ່າງໆ ລ້ວນແຕ່ແມ່ນພູມປັນຍາ ຂອງນັກປາດ. ສ້າງຂຶ້ນປີ ຄສ 1857 ທ້າຍການປົກຄອງ ຂອງສັກດີນາສະຫຍາມ, ເປັນເຈົ້າສັດທາ ຂອງພະເອກະລາດທີ 6; ທ້າວເຫງົ້າຊຽງກັນຍາ ແລະ ໄພ່ພົນໂຍທາ ໃນຂອບເຂດສາລະວັນ.

ພະຍາເຫງົ້າຊຽງກັນຍາ ໄດ້ນິມົນ ອາຈານຄູ ຢູ່ໄທ ຈາກນະຄອນລາດຊະສີມາ, ການເປັນຊ່າງນຳພາ ການກໍ່ສ້າງ ຄູ່ກັບສິມຫຼັງເກົ່າ ຂ້າງຫ້ອງການ ປກສ ແຂວງສາລະວັນ ປະຈຸບັນ, ວັດສະດຸກໍ່ສ້າງ ແມ່ນໄມ້ກັບດິນ, ມີ 54 ເສົາ, ວາດຊົງລາວບູຮານເຊັ່ນ: ສິ່ວເຈາະຮູ, ຕອກລູກໄມ້ຄັດຕ່າງໆ ສ່ວນຫຼາຍແມ່ນໃຊ້ໄມ້ ເຊັ່ນ: ໄມ້ມັນປາ, ໄມ້ແຄນ, ໄມ້ດູ່ ເປັນຕົ້ນ ຈາກນັ້ນ, ເພິ່ນນັ່ງ ຄວັດຮູບພາບ ຕາມປ້ານລົມ, ສີໜ້າປະຕູສະແດງເຖິງ ປະຫວັດສາດ ຂອງສາດສະໜາ ແລະ ຄວາມອຸດົມຮັ່ງມີ ສະໄໝບູຮານ. ປີ ຄສ 1920 ຂ້າຫຼວງໃຫຍ່ ຂອງຝຣັ່ງ ປະຈຳອິນດູຈີນ ໄດ້ຮັບທຶນ ຈາກເຄືອຈັກກະພັດ ແລະ ປະເທດທຶນນິຍົມ ເພື່ອມາປະຕິສັງຂອນ ວັດຖຸບູຮານ, ວັດວາສາດສະໜາ; ສຳລັບ ແຂວງສາລະວັນ ກໍ່ໄດ້ຮັບທຶນປະຕິສັງຂອນ ຫໍໄຕ ພະຄູຈັນທາ ມອບໃຫ້ຊຽງປ້ອມ ບ້ານດົງໜ້ອງ ຜູ້ມີສີມືເປັນຜູ້ສ້ອມແປງຕົບແຕ່ງລວດລາຍ ທີ່ຊຳລຸດຊຸດໂຊມ ໃຫ້ກັບຄືນມາຄືເກົ່າ ວັນທີ່ 10/06/1970. ຫໍໄຕປີດົກ ທີ່ເຫຼື້ອມສະຫງ່າ ຄຽງຄູ່ກັບຊາວພຸດ ທີ່ເຄົາລົບນົບໄຫວ້ ຕາມຮີດ 12 ຄອງ 14, ນັບໄດ້ 177 ປີ, ຖືກຝູງບິນ T28 ຂອງອາເມລິກາ ຍິງທະລາຍກາຍເປັນເຖົ່າຖ່ານ ແລະ ເສົາບາງຕົ້ນຍັງຊີ້ຟ້າ, ປະຈຸບັນ ການຈັດຕັ້ງຂັ້ນເທິງ ແລະ ມວນຊົນ ສາລະວັນໄດ້ເພີ່ມພະລັງສັດທາ ສ້າງຫໍໄຕຫຼັງໃໝ່ ຕາມແບບສະບັບເດີມ.

ແຫລ່ງ: ອົງການພັດທະນາການທ່ອງທ່ຽວ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *