Salavan Teacher Training College

ສະຫະພັນກໍາມະບານ ວິທະຍາໄລຄູສາລະວັນ ຖືກຮັບຮອງນາມມະຍົດ 5 ເປັນເຈົ້າ

ໃນຕອນເຊົ້າວັນທີ 18 ຕຸ​ລາ 2019 ຢູ່ທີ່ສະໂມສອນຂອງ​ວິ​ທະ​ຍາ​ໄລ​ຄູ ສະຫະພັນກໍາມະບານ ວິ​ທະ​ຍາ​ໄລ​ຄູ​ສາ​ລະ​ວັນ ໄດ້ຈັດກອງປະຊຸມສະຫຼຸບຕີລາຄາການຈັດຕັ້ງປະຕິບັດ ເນື້ອໃນຂໍ້ແຂ່ງຂັນ 5 ເປັນເຈົ້າປະຈໍາປີ 2019 ແລະປະກາດໄຂຂະບວນການແຂ່ງຂັນ 5 ເປັນເຈົ້າປະຈໍາປີ 2020 ໂດຍຈຸດ​ປະ​ສົງ​ຂອງກອງ​ປະ​ຊຸມແມ່ນ​ເພື່ອສະຫຼຸບການຈັດຕັ້ງປະຕິບັດ ເນື້ອໃນຂໍ້ແຂ່ງຂັນ 5 ເປັນເຈົ້າປະຈໍາປີ 2019 ແລະ ປະກາດໄຂຂະບວນການແຂ່ງຂັນ 5 ເປັນເຈົ້າປະຈໍາປີ 2020 ແລະ​ ປ່ອນ​ບັດ​ຄັດ​ເລືອກ​ຄະ​ນະ​ສະ​ຫະ​ພັນ​ກຳ​ມະ​ບານວິ​ທະ​ຍາ​ໄລ​ຄູ​ສາ​ລະ​ວັນ​ຊຸດ​ໃໝ່

ໂດຍການເປັນປະທານ​ຂອງ ທ່ານ ບຸນ​ນະ ໄຊ​ຍະ​ເພັດ ປະ​ທານ​ສະ​ຫະ​ພັນ​ກຳ​ມະ​ບານວິ​ທະ​ຍາ​ໄລ​ຄູ​ສາ​ລະ​ວັນ ໃຫ້​ກຽດ​ເຂົ້າ​ຮ່ວມ​ຂອງ​ສະ​ຫາຍ ສຸ​ລິດ​ ສິ​ລິ​ມະ​ໂນ​ທຳ ກຳ​ມະ​ການ​ຄະ​ນະ​ບໍ​ລິ​ຫານ​ງານ​ສູນ​ກາງ​ກຳ​ມະ​ບານ​ລາວ, ປະ​ທານ​ຄະ​ນະ​ບໍ​ລິ​ຫານ​ງານ​ສະ​ຫະ​ພັນ​ກຳ​ມະ​ບານ​ແຂວງ. ສະ​ຫາຍ ສຸ​ລິດ ສຸ​ລິ​ວົງ ເລ​ຂາ​ຄະ​ນະ​ພັກ​ຮາກ​ຖານ, ຜູ້​ອຳ​ນວຍ​ການວິ​ທະ​ຍາ​ໄລ​ຄູ​ສາ​ລະ​ວັນ. ມິ​ບັນ​ທ່ານ​ແຂກ​ຖືກ​ເຊີນ​ຈາກ​​ຮາກ​ຖານກຳ​ມະ​ບານ​ອ້ອມ​ຂ້າງ​ແຂວງ, ບັນ​ດາ​ສະ​ຫາຍຜູ້​ແທນ​ສົມ​ບູນ​ເຂົ້າ​ຮ່ວມ​ທັງ​ໝົດ 115 ​ສະ​ຫາຍ. ຍິງ 52 ​ສະ​ຫາຍ

ກອງປະ​ຊຸມ​ໄດ້​ດຳ​ເນີນ​ໄປ​ເປັນ​ເວ​ລາ​ໜຶ່ງ​ຄາບ​ທີ່​ເຕັມ​ໄປ​ດ້ວຍ​ຄວາມ​ຮັບ​ຜິດ​ຊອບສູງ​ຂອງ​ບັນ​ດາ​ຜູ້​ແທນ​ທີ່​ເຂົ້າ​ຮ່ວມກອງ​ປະ​ຊູມ​ເຊິ່ງ​ໄດ້​ພ້ອມ​ກັນ​ຄົ້ນ​ຄວ້າ​ປະ​ກອບ​ຄຳ​ຄິດ​ຄຳ​ເຫັນ​ໃສ່​ບັນ​ດາ​ຮ່າງ​ເນື້ອ​ໃນ​ເອ​ກະ​ສານ ແລະ ຕົກ​ລົງ​ຮັບ​ຮອງ​ເອົາ​ບັນ​ຫາ​ສຳ​ຄັນ​ຕ່າງໆ​ດັ່ງ​ນີ້:

  1. ກອງ​ປະ​ຊຸມ​ໄດ້​ເປັນ​ເອ​ກະ​ສັນ​ຢ່າງ​ສົມ​ບູນ​ຕໍ່​ຮ່າງ​ລາຍ​ງານ​ການ​ເມືອງ​ຂອງ​ຄະ​ນະ​ສະ​ຫະ​ພັນ​ກຳ​ມະ​ບານ​ວິ​ທະ​ຍາ​ໄລ​ຄູ​ທີ່​ໄດ້​ຕີ​ລາ​ຄາ​ຜົນ​ງານ ແລະ ໄຊ​ຊະ​ນະ​ໃນ​ການ​ປະ​ຕິ​ບັດ​ມະ​ຕິ​ກອງ​ປະ​ຊຸມ​ໃຫຍ່​ຄັ້ງ​ທີ V ເຊິ່ງໄດ້ຍົກໃຫ້ເຫັນຜົນສໍາເລັດ, ດ້ານດີ, ດ້ານອ່ອນ ຂໍ້ຄົງຄ້າງ, ບາງບົດຮຽນທີ່ຖອດຖອນໄດ້​ໃນ​ໄລ​ຍະ​ຜ່ານ​ມາ, ກອງ​ປະ​ຊຸມ​ໄດ້​ກຳ​ນົດ​ແຈ້ງ​ກ່ຽວ​ກັບ​ທິດ​ທາງ​ໜ້າ​ທີ່ 5 ປີ​ຂ້າງ​ໜ້າ​ແຕ່​ປີ 2019-2024
  2. ກອງ​ປະ​ຊຸມ​ໄດ້​ຕົກ​ລົງ​ຍ້ອງ​ຍໍ​ບຸກ​ຄົນ​ທີ່​ມີ​ຜົນ​ງານ​ດີ​ເດັ່ນ​ປະ​ກອບ​ສ່ວນ​ຊຸກ​ຍູ້​ການ​ເຄື່ອນ​ໄຫວ​ວຽກ​ງານ​ກຳ​ມະ​ບານ​ຕະ​ຫຼອດ​ໄລ​ຍະ 3 ປີ​ທີ່​ຜ່ານ​ມາ ​ຈຳ​ນວນ 69 ສະ​ຫາຍ, ຍິງ 32 ສະ​ຫາຍ ແລະ ໄດ້​ຮັບ​ຮອງ​ເອົາ​ສະ​ຫະ​ພັນ​ກຳ​ມະ​ບານ​ວິ​ທະ​ຍາ​ໄລ​ຄູ​ເປັນ​ສະ​ຫະ​ພັນ​ກຳ​ມະ​ບານ​ 5 ເປັນ​ເຈົ້າ​ໃນ​ໄລ​ຍະປີ 2017-2019
  3. ກອງ​ປະ​ຊຸມ​ໄດ້​ຮັບ​ຮອງ​ເອົາ​ບົດ​ສຳ​ຫຼວດ​ການ​ນຳ​ພາ​ລວມ​ຮອບ​ດ້ານ​ຂອງຮາກ​ຖານ​ກຳ​ມະ​ບານ​ວິ​ທະ​ຍາ​ໄລ​ຄູ​ຊຸດ​ທີ V ເຊິ່ງ​ໄດ້​ຍົກ​ໃຫ້​ເຫັນ​ຜົນ​ງານ​ການ​ຊີ້​ນຳໆ​ພາ ດ້ານ​ດີ, ດ້ານ​ອ່ອນ, ຂໍ້ຄົງຄ້າງ,ບາງບົດຮຽນທີ່ຖອດຖອນໄດ້, ພ້ອມ​ທັງ​ໄດ້​ມອບ​ໜ້າ​ທີ່​ການ​ເມືອງ​ອັນ​ສຳ​ຄັນ​ນີ້​ໃຫ້​ຄະ​ນະ​ບໍ​ລິ​ຫານ​ງານສະ​ຫະ​ພັນ​ກຳ​ມະ​ບານ​ວິ​ທະ​ຍາ​ໄລ​ຄູ​ສາ​ລະ​ວັນ​​ ​ຊຸດທີ I
  4. ກອງ​ປະ​ຊຸມ​ໄດ້​ໃຊ້​ສິດ​ປະ​ຊາ​ທິ​ປະ​ໄຕ​ປ່ອນ​ບັດ​ຄັດ​ເລືອກ​ເອົາຄະ​ນະ​ບໍ​ລິ​ຫານ​ງານສະ​ຫະ​ພັນ​ກຳ​ມະ​ບານ​ວິ​ທະ​ຍາ​ໄລ​ຄູ​ສາ​ລະ​ວັນ ຊຸດທີ I ຈຳ​ນວນ 9 ສະ​ຫາຍ, ຍິງ 2 ສະ​ຫາຍ ຈາກ​ຜູ້​ມີ​ເງື່ອນ​ໄຂ​ສະ​ໝັກ 11 ສະ​ຫາຍ , ຍິງ 3 ສະ​ຫາຍ ເພື່ອ​ສີບ​ຕໍ່ຊີ້​ນຳໆ​ພາ​ວຽກ​ງານ​ກຳ​ມະ​ບານ​ວິ​ທະ​ຍາ​ໄລ​ຄູ​ສາ​ລະ​ວັນ​ໃນ 5 ປີ​ຂ້າງ​ໜ້າ
  5. ກອງ​ປະ​ຊຸມ​ຄັ້ງ​ປະ​ຖົມ​ມະ​ລຶກຄະ​ນະ​ບໍ​ລິ​ຫານ​ງານສະ​ຫະ​ພັນ​ກຳ​ມະ​ບານ​ວິ​ທະ​ຍາ​ໄລ​ຄູ​ສາ​ລະ​ວັນ ຄັ້ງທີ I ໄດ້​ຕົກ​ລົງ​ເປັນ​ເອ​ກະ​ສັນ​ເລືອກ​ເອົາ​ສະ​ຫາຍ ສົມ​ບູນ ສີ​ລິ​ສົງ​ຄາມ ເປັນ​ປະ​ທານ, ສະ​ຫາຍ ຄານ​ສະ​ໜິດ ຈັນ​ທະ​ລາມ ແລະ ສະ​ຫາຍ ນາງ ຈັນ​ໂທ ໄຊ​ຍະ​ເສນ ເປັນ​ຮອງ​ປະ​ທານ. ກອງ​ປະ​ຊຸມໄດ້​ເລືອກ​ເອົາ​ສະ​ຫາຍ ນາງ ຈັນ​ໂທ ໄຊ​ຍະ​ເສນ ເປັນ​ປະ​ທານກວດ​ກາ, ເລືອກ​ເອົາ​ ສະ​ຫາຍ ຊາຍ​ເງິນ ໂພ​ທິ​ລາດ ແລະ ສະ​ຫາຍ ໂພ​ທອງ ພົງ​ສົງ​ຄາມ ເປັນ​ຮອງ​ປະ​ທານກວດ​ກາ

ກອງ​ປະ​ຊຸມ​ໄດ້​ຖື​ເປັນ​ກຽດ​ຢ່າງ​ສູງ​ຮັບ​ຟັງ​ການ​ໂອ້​ລົມ​ຂອງ​ ສະ​ຫາຍ ສຸ​ລິດ​ ສິ​ລິ​ມະ​ໂນ​ທຳ ກຳ​ມະ​ການ​ຄະ​ນະ​ບໍ​ລິ​ຫານ​ງານ​ສູນ​ກາງ​ກຳ​ມະ​ບານ​ລາວ, ປະ​ທານ​ຄະ​ນະ​ບໍ​ລິ​ຫານ​ງານ​ສະ​ຫະ​ພັນ​ກຳ​ມະ​ບານ​ແຂວງ ເຊິ່ງ​ທ່ານ​ໄດ້​ສະ​ແດງ​ຄວາມ​ຍ້ອງ​ຍໍ​ຊົມ​ເຊີຍ​ຕໍ່​ຜົນ​ງານ ແລະ ໄຊ​ຊະ​ນະ​ທີ່​ຍາດ​ມາ​ໄດ້ ຈາກ​ນັ້ນ​ທ່ານ​ຍັງ​ຮຽກ​ຮ້ອງ​ມາ​ຍັງ​ສະ​ມາ​ຊິກ​ກຳ​ມະ​ບານ​ທຸກ​ສະ​ຫາຍ​ຈົ່ງ​ໄດ້​ເພີ້ມ​ທະ​ວິ​ຄວາມ​ສາ​ມັກ​ຄີ​ເປັນ​ປຶກ​ແຜ່ນ​ແໜ້ນ​ໜາ, ບຸກ​ບືນ​ສູ້​ຊົນ​ຜ່ານ​ຜ່າ​ຂໍ້​ຫຍຸ້ງ​ຍາກ​ເພື່ອ​ພ້ອມ​ກັນ​ເຮັດ​ໃຫ້​ມະ​ຕິ​ກອງ​ປະ​ຊຸມ​ໃຫ​ຍ່ ຄັ້ງ​ທີ I ຂອງຄະ​ນະ​ບໍ​ລິ​ຫານ​ງານສະ​ຫະ​ພັນ​ກຳ​ມະ​ບານ​ວິ​ທະ​ຍາ​ໄລ​ຄູ​ສາ​ລະ​ວັນ​ບັນ​ລຸ​ຕາມ​ຄາດ​ໝາຍ​ທີ່​ວາງ​ໄວ້

ຂ່າວ: ສະ​ແຫວງ ຄຳ​ພິ​ໄລ

ພາບ: ນີ​ລະ​ມິດ ຈັນ​ທະ​ວົງ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *