Salavan Teacher Training College

ໜ່ວຍພັກຫ້ອງການທຳມະຊາດສຳເລັດກອງປະຊຸມໃຫຍ່ຄັ້ງທີ I

ໃນຕອນເຊົ້າວັນທີ 25 ທັນ​ວາ 2019 ຢູ່ທີ່ສະໂມສອນຂອງ​ວິ​ທະ​ຍາ​ໄລ​ຄູ ໜ່ວຍ​ພັກ​ຫ້ອງ​ການ​ທໍາມະຊາດໄດ້ຈັດກອງປະຊຸມໃຫຍ່ ຄັ້ງ​ທີ I ໂດຍຈຸດ​ປະ​ສົງ​ຂອງກອງ​ປະ​ຊຸມແມ່ນ​ເພື່ອຜ່ານ​ຮ່າງ​ລາຍ​ງານ​ການ​ເມືອງ ແລະ ທິດ​ທາງ​ໃນ 5 ປີ​ຕໍ່​ໜ້າ ພ້ອມ​ທັງ​ເລືອກ​ຕັ້ງ​ຄະ​ນະ​ໜ່ວຍ​ຊຸດ​ໃໝ່ ໂດຍການເປັນປະທານການ​ກ່າວ​ເປີດກອງ​ປະ​ຊຸມ ​ຂອງ ສະ​ຫາຍ ສົມບູນ ສີລິສົງຄາມ ​ເລ​ຂາ​ໜ່ວຍ​ພັກຫ້ອງ​ການທໍາມະຊາດ ໃຫ້​ກຽດ​ເຂົ້າ​ຮ່ວມ​ຂອງ​ ສະ​ຫາຍ ສຸ​ດອນ ວົງສະຫວັດ ຮອງເລ​ຂາ​ຄະ​ນະ​ພັກ​ຮາກ​ຖານ, ຮອງຜູ້​ອຳ​ນວຍ​ການວິ​ທະ​ຍາ​ໄລ​ຄູ​ສາ​ລະ​ວັນ. ມິ​ບັນ​ທ່ານ​ແຂກ​ຖືກ​ເຊີນ​ຈາກ​​ ຄະ​ນະ​ຈັດ​ຕັ້ງ​ແຂວງ, ຄະ​ນະໂຄ​ສະ​ນາ​ອົບ​ຮົມ​ແຂວງ, ຄະ​ນະ​ກວດ​ກາ​ພັກ​ລັດ​ແຂວງ ພ້ອມ​ສະ​ມາ​ຊິກ​ພັກ​ສົມ​ບູນ ແລະ ສຳ​ຮອງ​ເຂົ້າ​ຮ່ວມກອງປະ​ຊຸມ​ໄດ້​ດຳ​ເນີນ​ໄປ​ເປັນ​ເວ​ລາ​ໜຶ່ງ​ຄາບ​, ​ທີ່ເຕັມ​ໄປ​ດ້ວຍ​ຄວາມ​ຮັບ​ຜິດ​ຊອບສູງ​ຂອງ​ບັນ​ດາ​ຜູ້​ແທນ​ທີ່​ເຂົ້າ​ຮ່ວມກອງ​ປະ​ຊູມ​ເຊິ່ງ​ໄດ້​ຮັບ​​ຟັງ​ບັນ​ຫາ​ສຳ​ຄັນ​ຕ່າງໆ​ດັ່ງ​ນີ້:

  1. ກອງ​ປະ​ຊຸມ​ໄດ້ຮັບ​​ຟັງ​​ຮ່າງ​ລາຍ​ງານ​ການ​ເມືອງ ແລະ ທິດ​ທາງ​ໃນ 5 ປີ​ຕໍ່​ໜ້າ ​ຂອງ​ໜ່ວຍ​ພັກ​ຫ້ອງ​ການ​ທຳມະຊາດ ໂດຍ​ໃຫ້​ກຽດ​ຂື້ນ​ຜ່ານ​ຂອງ​ ສະ​ຫາຍ ​ປັນຍາ ຈັນທະລັງສີ
  2. ກອງ​ປະ​ຊຸມ​ໄດ້ຮັບ​​ຟັງການ​ຜ່ານ​ບົດ​ສຳ​ຫຼວດ​ການ​ນຳ​ພາໃນ 5 ປີ​​ຜ່ານ​ມາ ​ພ້ອມ​ທັງ​ກ່າວ​ອຳ​ລາ​ໜ້າ​ທີ່ ໂດຍ​ໃຫ້​ກຽດ​ຂື້ນ​ຜ່ານ​ຂອງ​ ສະ​ຫາຍ ​ປັນຍາ ຈັນທະລັງສີ
  3. ​ຈາກ​ນັ້ນ ສະ​ຫາຍ ນາງ​ ລິດ​ສະ​ໄໝ ສິດ​ທິ​ຈັກ ຄະ​ນະ​ຮັບ​ຜິດ​ຊອບ​ໂຄງ​ປະ​ກອບ, ໃຫ້​ກຽດ​ຂື້ນ​ຜ່ານ​ມາດ​ຖານ​ເງື່ອນ​ໄຂ​ຜູ້​ສະ​ໝັກ​ເລືອກ​ຕັ້ງ​ຄະ​ນະ​ໜ່ວຍ​ຊຸດ​ໃໝ່, ພ້ອມ​ທັງ​ຂໍ້​ຕົກ​ລົງ​ແຕ່ງ​ຕັ້ງຜູ້​ຮັບ​​ເລືອກ​ຕັ້ງຄະ​ນະ​ໜ່ວຍ​ຊຸດ​ໃໝ່ ຈຳ​ນວນ 5 ສະ​ຫາຍ, ຈາກ​ນັ້ນ ຄະ​ນະ​ປະ​ທານ​ໄດ້​ຜ່ານ​ຂໍ້​ຕົກ​ລົງ​ແຕ່ງ​ຕັ້ງ​ຄະ​ນະ​ຄວບ​ຄຸມ​​ການ​ປ່ອນ​ບັດ
  1. ກອງ​ປະ​ຊຸມ​ຄັ້ງ​ປະ​ຖົມ​ມະ​ລຶກໜ່ວຍ​ພັກ​ຫ້ອງ​ການທໍາມະຊາດ ຄັ້ງທີ I ໄດ້​ຕົກ​ລົງ​ເປັນ​ເອ​ກະ​ສັນ​ເລືອກ​ເອົາ​ສະ​ຫາຍ ອຸດ​ຕະ​ມະ ແສງ​ອາ​ລຸນ ເປັນ​ເລ​ຂາ​ໜ່ວຍ​ພັກ, ສະ​ຫາຍ ​ປັນ​ຍາ ຈັນ​ທະ​ລັງ​ສີ ເປັນ​ຮອງ​ເລ​ຂາ​ໜ່ວຍ​ພັກ. ສະ​ຫາຍ ​ໄຊ​ປະ​ເສີດ ວິ​ໄລ​ຈິດ ເປັນ​ຄະ​ນະໜ່ວຍ​ພັກ
  2. ກອງ​ປະຊຸມ​ໃຫ່ຍຄັ້ງ​ທີ I ຂອງໜ່ວຍພັກຫ້ອງການທຳມະຊາດ ​ໄດ້​ຮັບ​ຟັງ​ການ​ໂອ້​ລົມ​ຈາກ ​ສະຫາຍ ສຸດອນ ວົງສະຫວັດ ຮອງເລຂາຄະນະພັກຮາກຖານ, ຮອງຜູ້ອຳນວຍການວິທະຍາໄລຄູສາລະວັນ ເຊິ່ງ ສະຫາຍໄດ້​ສະ​ແດງ​ຄວາມ​ຍ້ອງຍໍ​ຊົມ​ເຊີຍ​ຕໍ່​ການ​ຊີ້​ນຳ-ນຳພາ​ຂອງ​ຄະນະ​ໜ່ວຍ​ຊຸດ​ເກົ່າ​ທີ່​ໄດ້​ຊີ້​ນຳ-ນຳພາ​ພະນັກງານ, ​ສະມາຊິກ​ພັກ, ມະຫາຊົນ​ກ້າວ​ທີ່ຢູ່​ໃນ​ຄວາມ​ຮັບຜິດຊອບ​ຂອງ​ຕົນ​ຜ່ານ​ຜ່າ​ອຸປະສັກ, ສິ່ງ​ທ້າ​ທ້າຍ ​ແລະ ຂໍ້​ຫຍຸ້ງຍາກ​ຕ່າງໆ​ໃນ​ການຈັດ​ຕັ້ງ​ປະຕິບັດ​ບັນດາ​ຄາດໝາຍ​ສູ້​ຊົນ, ທິດ​ທາງ​ແຜນການ​, ສາມາດ​ຍາດ​ໄດ້ຜົນສໍາ​ເລັດ​ອັນ​ຍິ່ງ​ໃຫ່ຍ​ໃນ​ຫຼາຍ​ດ້ານ, ພ້ອມ​ກັນ​ນັ້ນ ສະຫາຍ​ຍັງ​ໄດ້​ສະ​ແດງ​ຄວາມ​ເປັນ​ຫ່ວງ​ເປັນ​ໄຍຕໍ່​ກັບ​ບັນດາ​ດ້ານ​ທີ່​ຍັງ​ຄົງ​ຄ້າງ​ຜ່ານ​ມາ ​ແລະ ຮີບ​ຮ້ອນ​ແກ້​ໄຂ​ໃຫ້​ທັນ​ການ. ຈາກ​ນັ້ນ ສະຫາຍ ຍັງ​ໃຫ້​ທິດ​ຊີ້​ນຳ​ວຽກ​ງານ​ແຕ່​ລະ​ດ້ານ​ດ້ວຍ​ບັນຍາກ​າດທີ່​ສ້າງສັນ, ​ເປັນ​ກັນ​ເອງ, ສະຫາຍ​ຍັງ​ໄດ້​ຕີ​ລາຄາ​ສູງ ​ແລະ ​ເຊື່ອ​ໜັ້ນຕໍ່​ຄະນະ​ໜ່ວຍ​ພັກ​ຫ້ອງການທຳມະຊາດຊຸດໃໝ່ ທີ່​ຈະ​ສືບ​ຕໍ່ຊີ້​ນຳ-ນຳພາ​ພະນັກງານ, ສະມາຊິກ​ພັກ ​ແລະ ​ມະຫາຊົນ ຈັດ​ຕັ້ງ​ປະຕິບັດ​ມະຕິ​ກອງ​ປະຊຸມ​ໃຫ່ຍຂອງ​ໜ່ວຍ​ພັກ​ຫ້ອງການ​ທຳມະຊາດ ​ໃຫ້​ມີ​ຜົນງານ​ອັນ​ຍິ່ງ​ໃຫ່ຍກວ່າ​ເກົ່າ​ຢ່າງ​ຕໍ່​ເນື່ອງ. ສຸດ​ທ້າຍ​ ສະຫາຍຍັງ​ໄດ້​ເນັ້ນ​ໜັກ ​ແລະ ຮຽກຮ້ອງ​ມາ​ຍັງ​ສະມາ​ຊິກ​ພັກ, ພະນັກງານ ​ແລະ ອົງການ​ຈັດ​ຕັ້ງ​ມະຫາຊົນ ຕ້ອງເອົາໃຈໃສ່ຄົ້ນຄວ້າສຶກສາຮ່ຳຮຽນເອົາແນວທາງນະໂຍບາຍຂອງພັກຢ່າງເລິກເຊິ່ງ, ເອົາໃຈໃສ່ສຶກສາອົບຮົມການເມືອງແນວຄິດເປັນກົກໃຫ້ບັນດາສະຫາຍສະມາຊິກພັກ,ພະນັກງານ-ລັດຖະກອນພາຍໃນຄວາມຮັບຜິດຊອບຂອງຕົນ, ຍົກສູງບົດບາດການນຳພາໃນຖານະພັກກຳອຳນາດ, ເພີ່ມທະວີຄວາມສາມັກຄີທັງພາຍໃນ ແລະ ພາຍນອກຢ່າງກວ້າງຂວາງ, ​ເຊີດ​ຊູ​ນ້ຳ​ໃຈ​ອັນ​ສູງ​ສົ່ງ ​ແລະ ຍົກ​ສູງສະຕິ​ຄວາມ​ຮັບຜິດຊອບທາງດ້ານການ​ເມືອງ​ຂອງ​ຕົນ​ໃຫ້​ສູງຂຶ້ນ​ເທື່ອ​ລະ​ກ້າວໂດຍສະເພາະແມ່ນວຽກງານວັດ-ປະເມີນຜົນ-ພັດທະນາຄູ,ວຽກງານສະຖິຕິ-ຂໍ້ມູນຂ່າວສານ,ການປະກັນຄຸນນະພາບ ແລະ ວຽກງານອື່ນໆທີ່ຢູ່ໃນຄວາມຮັບຜິດຊອບ,  ເປັນເຈົ້າການຈັດຕັ້ງປະຕິບັດແນວທາງປ່ຽນແປງໃໝ່ຮອບດ້ານ, ເປັນເຈົ້າການປັບປຸງຕົນເອງໃຫ້ສູງຂຶ້ນເທື່ອລະກ້າວເພື່ອເປັນແບບຢ່າງທີ່ດີແກ່ມະຫາຊົນ, ຂຸດຄົ້ນ ແລະ ຊອກທຸກທ່າແຮງຄວາມບົ່ມຊ້ອນຂອງພະນັກງານວິຊາການຜູ້ທີ່ມີຄວາມຮູ້-ຄວາມສາມາດ ເພື່ອປະກອບສ່ວນພັດທະນາວຽກງານວິຊາການໃຫ້ດີຂຶ້ນຢ່າງບໍ່ຢຸດຢັ້ງ, ເຮັດ​ໃຫ້​ວຽກ​ງານ​ການ​ຊີ້​ນຳ-ນໍ​ພາ​ຂອງຄະນະ​ໜ່ວຍ​ພັກຕໍ່​ກັບ​ການ​ບໍລິຫານ-ຄຸ້ມ​ຄອງ ​ແລະ ການຈັດການ ​ໃນ​ການ​ພັດທະນາ​ວຽກ​ງານ​ການ​ສຶກສາມີ​ການ​ຫັນປ່ຽນ​ໃໝ່​ທີ່ຕັ້ງໜ້າຢ່າງ​ຕໍ່​ເນື່ອງ​ຕາມ​ແນວທາງ​ນະ​ໂຍບາຍ​ລວມຂອງ​ພັກ ​ເຊິ່ງ ຈະ​ນຳ​ໄປ​ສູ່​ການ​ກໍ່ສ້າງ​ພັກ​ໃຫ້​ມີ​ຄວາມ​ປອດ​ໃສ, ​ເຂັ້ມ​ແຂງ ​ແລະ ໜັກ​ແໜ້ນ​ຂຶ້ນ​ກວ່າ​ເກົ່າ. ກອງປະຊູມໃຫ່ຍຄັ້ງທີ I ຂອງ​ໜ່ວຍ​ພັກ​ຫ້ອງການທຳມະຊາດ ໄດ້ສະແດງຄວາມຊົມເຊີຍ ແລະ ຂອບອົກຂອບໃຈເປັນຢ່າງສູງຕໍ່ສະຫາຍປະທານກອງປະຊຸມ, ຄະນະໜ່ວຍພັກ, ບັນດາສະຫາຍເລຂາໜ່ວຍພັກຈາກ 5 ໜ່ວຍພັກຕ່າງໜ້າອົງການຈັດຕັ້ງມະຫາຊົນ ແລະ ແຂກທີ່ຖືກເຊີນອ້ອມຂ້າງທີ່ເຂົ້າຮ່ວມກອງປະຊູມໃນຄັ້ງນີ້.

 

ຂ່າວ: ສະ​ແຫວງ ຄຳ​ພິ​ໄລ

ພາບ : ນີ​ລະ​ມິດ ຈັນ​ທະ​ວົງ

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *